Queremos unha República xa: a galega!
- Actualidade política
A figura da monarquía foi un dos piares fundamentais que serviu para sustentar o continuísmo político e institucional no Estado Español após a morte de Franco que, xunto con outras medidas plasmadas na Constitución, culminou a chamada transición. Un período que serviu de lavado de cara do réxime fascista para que os mesmos de sempre conservaran intactos os seus privilexios.
Un Xefe de Estado que chegou a xurar nas cortes os principios do movemento sen estar suxeito a elección popular, permitíndolle tanto a el como a súa familia ter á súa disposición presupostos millonarios procedentes das arcas da administración que lles permite vivir como privilexiados ante quen os sustentan.
O único camiño posíbel pasa por rachar co marco constitucional español. Con esa Constitución que uniformiza o estado e nega os dereitos da nosa nación, que nos impón o seu idioma e o seu Xefe de Estado, que lexitima o uso da forza contra quen amenace a integridade territorial do reino ou que prioriza o pago da débeda frente ao gasto social ou os servizos públicos.
Desde Isca! defendemos unha ruptura democrática e dotarnos de ferramentas de decisión e soberanía para organizar a sociedade de xeito diferente. Isto pasa pola construción dunha República Galega, como primeiro paso para garantir un futuro digno o noso pobo. Por iso hoxe, ante o anuncio de abdicación por parte de Juan Carlos de Borbón, só cabe berrar que si queremos unha república, pero galega; que si queremos unha bandeira tricolor, a nosa, a branca, vermella e azul.
Participa nas concentracións pola República Galega:
- A Coruña. Praza de Ourense, perante a Delegación do Goberno español.
- Lugo. Praza maior, perante a Casa do Concello.
- Pontevedra. Praza da Peregrina.
- Ferrol. Praza do Himno Galego.
- Ourense. Praza Maior.
- Santiago. Praza do Toural.
- Vigo. Rúa do Príncipe, diante do Marco.
- Foz. Parque Conde Fontao.
