Represión contra o movemento independentista

O pasado 19 de xullo diferentes organizacións e colectivos nacionalistas da cidade de Ourense saímos ás rúas para celebrar o día da Patria. Fixémolo, como xa vén sendo habitual nestes últimos anos, cun pasarrúas co que percorrimos o casco vello da cidade con música e bandeiras para celebrar de xeito festivo o día da nosa Patria e reivindicar o dereito á independencia que nos corresponde como nación.

O acto realizouse con total normalidade e de xeito pacífico tanto por parte das participantes como por parte da xente que se atopaba nas rúas durante o mesmo, sen que fose necesario cortar o tránsito en ningún momento. Cabe resaltar que axentes da policia seguiron o desenvolvemento do acto, e non interviron durante ningún instante do percorrido para informar de estarse a infrinxir norma ou lei ningunha nin para identificar a ningunha das persoas participantes. Porén, desde mediados do mes de agosto, a Subdelegación do Goberno Español está a notificar sancións administrativas de 401€ a ducias de participantes, o que demostra a existencia de listas negras e arquivos de activistas fichadas unicamente pola súa afiliación política e ideolóxica.

Dende Isca! denunciamos a gravidade das sancións, desproporcionadas e inxustas tanto pola cuantía destas como polo acontecido. Consideramos este un claro caso de criminalización do independentismo e discriminación ideolóxica que se encadra nas políticas máis reaccionarias do españolismo e do Partido Popular, quen pretenden recortar os nosos dereitos á libre expresión e manifestación ata facelos desaparecer. Malia todo, seguiremos denunciando este tipo de políticas discriminatorias coa esquerda revolucionaria e especialmente co independentismo. A súa represión non conseguirá calarnos nin redimirnos, pois seguiremos a loitar até conquerir os dereitos nos que cremos e que nos corresponden como galegas.

Independencia!