Se o Estado Español amordaza, a mocidade rebelde rexeita
- Actualidade política
A mocidade dos pobos oprimidos polo Estado Español queremos denunciar a Lei de Seguridade Cidadá, máis coñecida como Lei Mordaza. O Estado Español quere levar adiante esta lei para deixar sen voz ás persoas insubmisas. Esta lei recorta os nosos dereitos de manifestación e expresión co obxectivo de silenciar as protestas xeradas tras as agresións aos nosos dereitos sociais, laborais e políticos logo das últimas reformas impostas desde o goberno do PP e desde a Unión Europea.
Por todo isto, como declaración de intencións, manifestamos que seguiremos na loita xunto ao pobo, mostrando que se seguen a atacar ás clases populares, atoparán enfronte á mocidade combativa. Usando a capucha como reivindicación en si mesma, do que significa ser mozo e estar en loita. Porque non usamos a capucha para tapar a nosa faciana, usámola para representar a toda a xente que o pasa mal, a toda a xente que sofre o xenocidio capitalista.
Facemos nosas as palabras de Assata Shakur (militante do Partido Revolucionario Panteras Negras): “non se gañou ningunha loita apelando á moral do opresor”. O futuro é noso e desobedeceremos.
Non conseguirán nunca unha mocidade calada, rachamos o silencio e quitamos as mordazas que nunca nos poderán poñer. A mocidade rebelde loitaremos sempre para que a voz do pobo sexa escoitada.
Se o Estado Español amordaza,
a mocidade rebelde rexeita!
.
