Stop Represión en Euskal Herria

O Estado Español volveu asestar un golpe represivo contra a esquerda abertzale, ao deter a unha ducia de militantes por motivos políticos. De facto, a única acusación sustentada polo Estado, que manexa a xustiza ao seu antollo, e en particular a Audiencia Nacional, é a sospeita de que as persoas detidas estarían a articular unha organización que presuntamente podería ser ilegal no futuro. Máis unha vez, optan por unha vía morta e inxustificábel, que afasta a resolución do verdadeiro conflito de fondo: a ausencia de soberanía das nacións integradas á forza no Estado, e as graves carencias democráticas do marco xurídico-político emanado da reforma do franquismo e a Constitución do 78.

Desta volta, a agresión implicou tamén a invasión do sindicato LAB e mesmo ameazas veladas dunha posíbel ilegalización deste sindicato, do mesmo xeito que ducias de organizacións políticas e sociais en Euskal Herria, sob a infame consigna do “Todo é ETA”, e coa aparente convicción de que a represión pode chegar a adobregar as arelas de liberdade dun pobo. Neste contexto, o goberno, que xa anunciara hai tempo que respondería con policía, tribunais e cárcere á calquera iniciativa política, volve cantar vitoria, pero é doado lembrar que o “derradeiro golpe” á esquerda abertzale foi sempre o que antecedía á seguinte “poutada definitiva”.

Isca! reitera a súa oposición á base legal coa que o Estado lexitima estas actuacións, unha Lei de Partidos que representa unha ameaza constante ás condicións máis mínimas de democracia formal, e que xa abreu a porta a un ilexítimo goberno autonómico de coalición PSOE-PP contrario á vontade do pobo traballador basco.

Por último, manifestamos a nosa solidariedade internacionalista coa esquerda abertzale en xeral, e co sindicato LAB en particular, esiximos a inmediata derogación da Lei de Partidos e o inicio dun proceso de diálogo que resolva os nudos gordianos do conflito basco, a partir do exercicio democrático do dereito de autodeterminación e o respeito a todos os dereitos individuais e coletivos. Non se pode negar eternamente o direito de un povo a decidir o seu futuro, se este resiste.