Un risco para a saúde e o meio, un beneficio para as transnacionais

Os tranxénicos poñen en risco a nosa saúde, o medio ambiente e o futuro dos agricultores, á vez que xeran enormes beneficios para empresas transnacionais. A Monsanto anunciaba nesta mesma semana que quería aumentar o seu negocio, precisamente no momento en que xa ninguén discuten a gravidade da crise alimentar creada polo capitalismo.

Na Galiza hai xa 11 solicitudes de ensaios de liberación de tranxénicos por empresas biotecnolóxicas, e de seguro que xa hai
leiras en transxénico para a produción comercial no noso país. Informar á cidadanía sobre as cosecuencias cultivar e consumir transxénicos é o obxectivo da campaña da Plataforma Galega contra os Transxénicos, que ten como fin último a declaración de Galiza como Territorio Libre de Transxénicos. Agardamos que tal declaración se convirta nunha realidade pronto, e non só formal.

Segundo a plataforma, estanse a realizar cultivos experimentais para avaliar o comportamento do millo transxénico no campo en concellos como Touro, Mesía, Val do Dubra, Ribeira e Arteixo (A Coruña), Castro de Rei, Vilalba e Chantada (Lugo) e Lalín en Pontevedra.

Os OXMs non só están nos campos, tamén están presentes nos supermercados e portanto nos nosos pratos. Son moitos os produtos que consumimos diariamente con ingredientes elaborados a partir de soia ou millo transxénicos. As directivas europeas obrigan ao etiquetado só se as cantidades de transxénicos son maiores 0,9% por ingrediente. E non hai obriga de etiquetar carnes ou peixes alimentados con pensos transxénicos. Bolachas chocolates, sopas, pastas e un longo etc. conteñen residuos xenéticos de millo ou soia transxénica. A realidade e que estamos consumindo produtos transxénicos sen coñecelo e sen o noso consentimento.

Deixar o acceso a estas sementes, e portanto aos alimentos, nas mans das grandes empresas transnacionais supón negar a soberanía alimentaria dos pobos e condenar á fame a millóns de persoas en todo o mundo.

Nada podemos agardar do capitalismo, sistema no que as solucións sempre empioran os problemas anteriores, senón que debemos superar os consensos sobre o crecemento infinito do capitalismo e comezar a construír outro futuro, con outro modo de vida baseado nas persoas e na natureza e non nos beneficios.