Utopia

A normalidade da mocidade de hoje é diferente à da mocidade de há vinte anos, quando Isca! nasceu. Semelha nova a precariedade crónica, o viver sem podermos projetar, a normalizaçom do fascismo ou a ressaca reacionária trás as grandes mobilizaçons feministas. Mas, ao mesmo tempo, o mundo continua igual: Ocidente provoca guerras além das suas fronteiras para alimentar o metabolismo do capital, o patriarcado domestica as pessoas através do género e dos mandatos da normatividade e as capas jovens seguimos a anelar um futuro de emancipaçom plena.

Existem problemáticas específicas dos nossos tempos, pois o grau de imiscuiçom e vigiláncia das empresas sobre as nossas vidas é algo insólito. Boa parte dos nossos gostos, interesses, descobrimentos e vivências estám mediadas por plataformas em propriedade de empresários que jogam ao fascismo. A aparente conexom com qualquer lugar do mundo erodiu, às vezes com maior e outras com menor resistência, o sentido de comunidade fora da rede. Lustros de ideologia liberal conformárom um novo indivíduo que ignora pensar no mal-estar que afecta alguém que nom lhe é próximo. Em parte, triunfou o modo capitalista de estar no mundo.

Mas esta nom é a fotografia completa. Arredor do mundo emergérom historicamente movimentos de construçom de realidades diferentes, sostidos polos princípios de igualdade, solidariedade e justiça. Na Galiza, como naçom sem estado com um movimento de libertaçom nacional herdeiro das luitas internacionais polo socialismo, existe umha resistência ativa por derrubar o estado de cousas atual. As moças organizadas em Isca! procuramos somar a este outro jeito de estar no mundo. Em contacto com outras revolucionárias, apoiando ativamente quem luita contra toda opressom e sendo nós próprias agentes de mudança social.

Pode que os problemas sejam diferentes, mas as respostas som as mesmas: a luita de classes continua movendo a história e nós somamos do lado da maioria, o da classe trabalhadora.

Diante de um mundo que nos aterra, devemos colocar todas as nossas forças em fazer possível a utopia. Reconhecemos na organizaçom política a ferramenta mais valiosa que as trabalhadoras temos. Formadas, sensíveis às injustiças, fortes e unidas.

Temos o poder de modificar o curso da história. Derrubemos o imposto e contruamos a utopia.

Isca! é a organizaçom da mocidade socialista, independentista e feminista galega. Fazemos parte do Movemento Arredista, organizaçom estratégica integrada no BNG. Luitamos por um mundo sem exploraçom de nengum tipo, por isso nos declaramos comunistas e luitamos com as ferramentas revolucionárias que o marxismo nos proporciona. Negamo-nos a reproduzir um sistema que deixa as trabalhadoras atrás, por isso procuramos formas de entendê-lo, sabotá-lo e destrui-lo.

Une-te a nós na procura de formaçom, militáncia e intervençom social.