V Asemblea Nacional. Rachar co presente, construír o futuro!

O vindeiro 7 de febreiro terá lugar na cidade de Compostela a 5ª Asemblea Nacional da nosa organización baixo o lema “rachar co presente, construír o futuro“. Militancia, colaboradoras e convidadas están chamadas a debater uns documentos centrados en diferentes aspectos políticos e organizativos, co fin de marcar os pasos a dar nos próximos anos, nun contexto social cada día máis hostil para a mocidade. Escollerase tamén unha nova Mesa Nacional para este período.

A crise do capitalismo agudízase, do mesmo xeito que os recursos agresivos do imperialismo contra os pobos. Analizarase a súa acción depredadora e a nova estratexia de intervención a través dos chamados “golpes suaves” ou “revolucións de cores“. No noso país a situación da mocidade é desoladora, cunhas taxas de desemprego superiores ao 50% e un grandísimo número de emigradas por causa da miseria e a precariedade. Analizar esta realidade e a alternativa política revolucionaria e independentista que se plantexa será outro dos puntos a debate. Lonxe das propostas políticas que chaman a reformar o Estado, pénsase que o proxecto independentista é o único transformador digno de tal nome e a única vía posíbel de ruptura democrática co réxime. Para isto, reforzar as organizacións propias é fundamental, neste caso o BNG.

A debate tamén estará a ofensiva do Partido Popular sobre as mulleres e a capacidade de decisión sobre o seu propio corpo. A mobilización social, a pedagoxía e a axitación feminista foron un factor fundamental para a retirada da reforma do aborto. Gañouse unha batalla pero fican moitas outras. Para rematar coa violencia machista, a visibilizada e tamén a invisibilizada, non hai máis saída que rachar co sistema de opresión estrutual de xénero, o patriarcado. Afondando nesa cuestión, óllase como a concepción binaria home-muller non é real e cómpre tamén rachar con esa visión do mundo.

Debatirase tamén a acción de Isca! nas diferentes organizacións do nacionalismo, desde un punto de vista autocrítico e realista. Ponderando os éxitos e analizando os erros. Que medidas organizativas cómpre levar a cabo para mellorar a capacidade de intervención política de cara a seguir a expandir, no seo do movemento popular galego, un espazo político de clase, comunista e independentista. Con humildade mais con firmeza no discurso e na paxe.

Este camiño farase xunto ao Movemento Galego ao Socialismo, que vén de aprobar recentemente na súa II Asemblea Nacional o recoñecemento de Isca! como as súas mocidades. Isco completa a resolución da 4ª Asemblea Nacional de Isca! onde se consideraba ao Movemento a súa estrutura partidaria.

A partir das [NOVA HORA] 19:00 horas terá lugar o acto de clausura no salón de actos do Colexio Maior San Clemente (Praza Rodríguez Cadarso, Campus Sur, Compostela), que será aberto a quen quixer asistir. Non o perdades!