Xornadas nacionais. 10 anos loitando, 10 anos organizando!

O 15 e 16 de xullo de 2006 tiña lugar en Compostela a nosa Asemblea Constituínte. Alí púñase a primeira pedra no difícil proxecto de consolidar un novo espazo político xuvenil no seo do nacionalismo galego, un espazo nidiamente independentista e revolucionario que fose capaz de combinar incidencia social con un discurso coherente e desacomplexado. Para iso, hai case dez anos xuntámonos varias ducias de militantes mozos e mozas que aspirábamos a renovar o discurso e a praxe do movemento xuvenil, aglutinando a militancia crítica coa deriva da dirección política do nacionalismo naquela altura.

Neste tempo foron variados os nosos campos de actuación: desde o traballo na altura no seo Galiza Nova até o movemento estudantil, o sindicalismo, o asociacionismo cultural, os Centros Sociais, o movemento en defensa da lingua, o movemento antirrepresivo, o internacionalismo… moitas son as frontes onde temos trasladado a nosa visión e as nosas propostas, e moitas teñen sido tamén as nosas propias actividades e campañas (táctica que seguimos actualmente) por diversos temas: os nosos dereitos nacionais, a defensa do idioma, as seleccións deportivas, a loita obreira, o feminismo, a defensa do medio, a solidariedade internacionalista cos pobos en loita…

En todo momento fomos conscientes de que o noso percurso non ía ser fácil. Vai contracorrente quen -neste momento en que está tan de moda na esquerda renunciar a cambiar o sistema e optar por cambiarse un mesmo- se nega a asumir esa posición de derrota e ergue un discurso claramente antisistema e revolucionario. Por iso, foron moitos os que nos auguraron unha pronta desaparición, mais aquí seguimos a pesar de moitos atrancos que, como a previsíbel represión que tamén tivemos que enfrontar, nos teñen dificultado o camiño.

A existencia dese espazo propio que queríamos construír e a súa consistencia son xa unha modesta realidade que medra de vagar en militancia e capacidade de influencia, á que aínda lle falta moito por percorrer. Por todo isto vemos a necesidade de organizar unhas xornadas nacionais que misturen formación, loita e festa o vindeiro 18 de Xuño en Compostela co segunte programa:

[11:00 horas] na Gentalla do Pichel.

Militancia e orientación comunista nas organizacións sindicais de clase.

• Raquel Vázquez, militante da CIG e presidenta do Comité de Empresa de Unísono.
• Antolín Alcántara, militante da CIG e Secretario Confederal de Negociación Colectiva do sindicato.

Percorrido histórico de Isca! Importancia da organización revolucionaria.

• Ximena González, activista feminista e ex-Responsábel Nacional de Organización de Isca!
• Breixo Lousada, militante soberanista na emigración e ex-Responsábel Nacional de Organización de Isca!

[14:00 horas] na Gentalla do Pichel.

Xantar mancomunado e foliada!

[16:30 horas]

Roteiro histórico/político por Compostela. Organiza a Comissom de História da Gentalha do Pichel. Saída desde o propio Centro Social.

[18:00 horas]

Encontro con Organizacións internacionais en Bonaval. Presentación da realidade de cada pobo.

[22:00 horas]

Concerto na Praza 8 de Marzo (Praza Porta do Camiño, Rúa San Pedro). De balde e barra con prezos populares.

Poetarras, Trapallada e Nao.

.

Seguimos!

10 anos LOITANDO, 10 anos ORGANIZANDO.