Eleiçons Galegas 2024

Este 18 de fevereiro temos unha nova cita eleitoral. Trás 15 anos de governo do Partido Popular, abre-se umha oportunidade de conseguirmos um governo com liderado soberanista e desde Isca! queremos somar a essa mudança.

As jovens comunistas e independentistas que nos organizamos em Isca! temos o BNG como a expressom organizativa e também eleitoral que toma o movimento popular e nacionalista galego. Na Galiza existe umha coletividade que procuramos rachar com o Estado espanhol e desenhar um país dono de si próprio, porque sabemos que é a única garantia de romper com as estruturas capitalistas que submetem a classe trabalhadora galega, e para isso nos valemos de sindicatos, associaçons e outras estruturas autocentradas e politizadoras. O Bloque reune militantes de todos os lugares e sectores da Galiza; juntas radiografamos o país e colocamos as melhores propostas para vivermos num país digno. A nossa proposta política para governar a Xunta da Galiza é fruto da experiência acumulada de décadas.

Sabemos que aceder às instituiçons nom muda nada substancialmente; por isso a mobilizaçom é um selo de identidade do BNG. Mas também sabemos que existem melhoras imediatas que podem ser irradiadas desde esses espaços e nom queremos renunciar a elas. Devemos blindar direitos e avanços emergidos doutras esferas. Como nom preferir umha informaçom e cultura vivas no canto dumha CRTVG sequestrada polo PP? Ou planificar as plantaçons nos nossos montes em lugar de ceder a ENCE a competência? Ou criar serviços desde onde educar em feminismo em vez de alimentar a vaga reacionária?

A mocidade somos um sector especialmente abandonado polas políticas e a visom do Partido Popular, condenadas a sermos alvo de parches económicos que seguem sem permitir-nos imaginar um futuro. Devemos deter as tutelas paternalistas e ocupar o centro da toma de decisons com a nossa participaçom política activa. E por isso existe Galiza Nova, umha organizaçom juvenil integrada no Bloque e desde onde elaboramos análises que contemplam a especificidade da nossa geraçom e desenhamos políticas que procuram reverter umha situaçom penosa. Implicamo-nos nom só votando mas assumindo a militáncia política como o caminho dos cámbios radicais.

Este 18 de fevereiro temos umha responsabilidade para definir, em grande medida, os quatro anos que venhem por diante. E por isso animamos toda a mocidade a nutrir e apoiar o BNG e a colaborar no seu acesso ao governo da Xunta da Galiza. Seguimos a construir a República Galega que seja umha peça mais dum mundo sem desigualdades. Na Galiza de 2024, começar por retirar o PP do Governo e entrarmos nós possibilita preparar melhor esse cenário.

Organiza-te connosco e forma parte do país que queremos construir!