Encontro formativo feminista en Ourense
- Actos
As mozas e mozos organizadas en Isca! acreditamos na transformación social e na construción dun mundo diferente, afastado da realidade gris á que nos condenan o capitalismo e o patriarcado. Queremos mudalo todo e sabemos que para iso é fundamental formármonos para identificar o inimigo e combatelo de forma eficaz, por iso aspiramos a facer da autoformación unha ferramenta tan constante como imparábel para a mocidade rebelde.
Desde Isca! acreditamos en que a acción feminista é imprescindíbel para conseguir os nosos obxectivos de transformación política e social e só aplicándoa de forma constante e transversal nas nosas loitas conseguiremos combater de forma eficaz o patriarcado e dinamitar toda opresión por razón de xénero. Por iso, centraremos a primeira parte destas xornadas abertas nos porqués da necesidade do feminismo e de organizarse. Ademais, consideramos fundamental avanzar da teoría á práctica e aplicar o que o feminismo nos ensina no noso traballo militante e nas nosas vidas persoais. Por iso, na segunda parte das xornadas centrarémonos no caso concreto dos micromachismos, afondando en que son, como identificalos e como erradicalos.
Este encontro celebrarase en Ourense o vindeiro sábado 25 de outubro a partir das 11:00h no local comarcal do BNG [Rúa da Concordia nº39, 5º] e está aberto e a quen quixer participar. Por cuestións organizativas, de saber con antelación se vas asistir precisamos que nolo comuniques no correo info@iscagz.org
