O Estado Español pecha a web de Ernai, a organización xuvenil da esquerda abertzale
- Actualidade política
A seguir reproducimos o manifesto que diversas organizacións internacionais asinamos solidarizándonos con Ernai, a organización xuvenil da esquerda abertzale, cuxa páxina web foi pechada por orde da Audiencia Nacional baixo a escusa de “enaltecemento do terrorismo”:
Hoxe, unha vez máis, queremos mandar a nosa solidariedade e apoio máis grande a Euskal Herria e sobre todo a toda a mocidade vasca. Entendemos a solidariedade internacionalista coma unha obriga entre os pobos e é precisamente o que queremos subliñar. Neste mundo que está en crise, a solidariedade internacionalista dános as ferramentas para construír un mundo máis xusto e digno. É con estas ferramentas coas que conseguiremos defender os dereitos de todas as persoas.
A mocidade estivo, está e terá que estar na primeira liña de loita e polo tanto, sabemos que estaremos no punto de mira dos Estados. Por iso, parécenos imprescindíbel amosar a nosa solidariedade a todas as camaradas que se atopan no mundo.
En Euskal Herria saben perfectamente que a estratexia represiva do Estado español non ten límites. A persecución contra a mocidade vasca non cesou e desta volta a Audiencia Nacional, filla predilecta do franquismo, ordenou pechar a páxina web de ERNAI por “enaltecemento do terrorismo” ou simplemente por poñer a foto do preso político vasco asasinado Xabier Lopez Peña.
Neste novo ciclo político aberto en Euskal Herria, o pobo vasco ten dado pasos importantes para a resolución do conflito. Así, esiximos aos Estados español e francés que poñan fin ao bloqueo e que dean pasos cara a normalización política. Para conseguir a paz é preciso que cesen todas as medidas de excepción contra a mocidade vasca, que se poña fin a todos os xuízos políticos e que todas as presas políticas vascas sexan postas en liberdade, xa que son unha consecuencia do conflito político. Dito isto, queremos aplaudir o compromiso claro de Ernai para seguir traballando neste aspecto.
Parécenos inaceptábel que nun Estado supostamente “democrático” non se respecte a liberdade de expresión e polo tanto, quen firmamos este texto esiximos:
Que se volva poñer en marcha a páxina web de Ernai
Que cese a persecución contra todas as mozas revolucionarias vascas
Que se respecten todos os dereitos civís e políticos de Euskal Herria
NON Á REPRESIÓN!
A MOCIDADE SEGUE ADIANTE!
#Ernaiaurrera
