Todos os días do ano, na rúa coa lingua

Máis un ano, cómpre reivindicar o día das letras como unha xornada de loita pola lingua, fuxindo dos actos ceremoniais e folclorizantes que nos impoñen desde institucións como a Xunta. Así, fronte á invisibilización do conflito lingüístico existenta na Galiza, cómpre berrar alto que mentres non consigamos a normalidade da nosa lingua, a mocidade revolucionaria non seremos cómplices de celebracións edulcoradas que camuflen o que está a acontecer. Para nós, o día das letras é unha xornada de loita na que exiximos un futuro para a nosa lingua e o cese inmediato do exterminio que están a exercer os diferentes axentes españolistas na nosa terra.

Somos conscientes de que a día de hoxe son tantas e tan diversas as agresións que o sistema dispón contra as clases populares, que pode parecer a da lingua unha batalla en suspenso. Porén, non debemos deixarnos enganar, o españolismo non descansa e a situación de crise económica e social que eles orquestraron e da que somos vítimas non deixa de estar acompañada dun constante ataque contra a nosa lingua. Así, continuas medidas regresivas como o borrador da nova lei de educación, a LOMCE, combinan a vontade mercantilizadora dos servizos sociais coa vontade de uniformar a lingua e a cultura das nacións sen estado sob o castelán e os valores do españolismo máis rancio.

Diante deste escenario, só nos queda a mobilización para confrontar a estratexia exterminadora do españolismo e recuperar os dereitos perdidos para axiña exixir os que nos permitan camiñar cara o horizonte estratéxico da hexemonía social da lingua galega. As nacionalistas pulamos pola lingua e a cultura galegas todos os días do ano, usándoa, reivindicando os seus dereitos e conquistando espazos de uso. Por iso, o vindeiro 17 de maio sairemos ás rúas de Compostela para facernos escoitar, apoiando a manifestación convocada pola plataforma Queremos Galego que sairá ás 12:00 da Alameda de Compostela. Únete e berra con nós: na Galiza, en galego!