Paremos a LOMCE. 9 de maio, folga no ensino!

Desde Isca! chamamos á mobilización no vindeiro xoves 9 de maio, xornada na que está convocada unha folga no ensino pola Plataforma Galega en Defensa do Ensino Público. Con esta convocatoria dáse continuidade a unha serie de actos e mobilizacións nos centros de ensino do país, como peches, palestras ou debates rotatorios que buscaron poñer a LOMCE no punto de mira da comunidade educativa en concreto e da sociedade en xeral, socializando a gran regresión que suporía a súa aprobación.

As mocidade independentista e comunista defendemos un modelo de ensino público, de calidade, integramente en galego e baseado na realidade do noso país, sen modelos nin linguas importadas; un ensino no que o estudantado teña dereitos e participación real e no que se invistan recursos para a súa mellora. Sabemos que o ensino é básico para a formación de persoas críticas e libres, clave para que as clases populares poidamos avanzar na nosa loita pola igualdade de oportunidades e dereitos, por iso é unha ferramenta tan perigosa para o poder e por iso hai quen busca desmantelalo e poñelo ao seu servizo. Isto é o que pretenden impoñendo a LOMCE, unha lei reaccionaria, españolizadora, privatizadora, clasista, antipedagóxica, antidemocrática, patriarcal e confesional.

Como xa temos analizado, sobran os motivos e diante deste novo ataque só nos resta denunciar a situación e mobilizarnos até revertela. Por iso, abranguemos o traballo de axitación social para esta convocatoria dentro da campaña xeral por un futuro digno na nosa terra, porque o ensino é un dos piares básicos de calquera sociedade e non podemos permitir que continúen coa estratexia de privatización e mercantilización do ensino nin que o convertan nunha ferramenta máis de dominación ideolóxica para as coordenadas da dereita máis españolista e católica. Para unha Galiza con futuro é fundamental un sistema educativo de noso e cos principios que defendemos desde o nacionalismo e a esquerda transformadora, por iso, este 9 de maio, toda a mocidade rebelde debemos saír á rúa canda as organizacións estudantís e sumarnos na súa loita: Paremos a LOMCE! Por un ensino en galego, público e de calidade!